Beáta es, Virgo María, quæ Dóminum portásti, Creatórem mundi: genuísti qui te fecit, et in ætérnum pérmanes Virgo...

Deus, qui errata córrigis, et dispérsa cóngregas, et congregáta consérvas: quǽsumus, super pópulum christiánum tuæ uniónis grátiam cleménter infúnde; ut, divisióne rejécta, vero pastóri Ecclésiæ tuæ se úniens, tibi digne váleat famulári. Per Dóminum.

Oratio ad tollendum schisma

Today is the feast of the Presentation of Our Blessed Lady in the Temple at Jerusalem. At Barroux, Saint Columbanus is commemorated; not, however, in the Missale Romanum.

Hierosólymis Præsentátio beátissimæ Dei Genitrícis Vírginis Maríæ in Templo.

Lectio 1
De Parábolis Salomónis
Prov 8:12-17.
12 Ego sapiéntia hábito in consílio et erudítis intérsum cogitatiónibus.
13 Timor Dómini odit malum: arrogántiam, et supérbiam, et viam pravam, et os bilíngue detéstor.
14 Meum est consílium et ǽquitas, mea est prudéntia, mea est fortitúdo.
15 Per me reges regnant, et legum conditóres justa decérnunt;
16 Per me príncipes ímperant, et poténtes decérnunt justítiam.
17 Ego diligéntes me díligo; et qui mane vígilant ad me, invénient me.

R. Sancta et immaculáta virgínitas, quibus te láudibus éfferam, néscio:
* Quia quem cæli cápere non póterant, tuo grémio contulísti.
V. Benedícta tu in muliéribus, et benedíctus fructus ventris tui.
R. Quia quem cæli cápere non póterant, tuo grémio contulisti.

 

 

Lectio 2
Prov 8:18-25.
18 Mecum sunt divítiæ et glória, opes supérbæ et justítia.
19 Mélior est enim fructus meus auro et lápide pretióso, et genímina mea argénto elécto.
20 In viis justítiæ ámbulo, in médio semitárum judícii,
21 Ut ditem diligéntes me et thesáuros eórum répleam.
22 Dóminus possidébit me in inítio viárum suárum, ántequam quidquam fáceret a princípio.
23 Ab ætérno ordináta sum et ex antíquis, ántequam terra fíeret.
24 Nondum erant abýssi, et ego jam concépta eram;
25 Necdum fontes aquárum erúperant, necdum montes gravi mole constíterant; ante colles ego parturiébar.

R. Congratulámini mihi, omnes qui dilígitis Dóminum: quia cum essem párvula, plácui Altíssimo,
* Et de meis viscéribus génui Deum et hóminem.
V. Beátam me dicent omnes generatiónes, quia ancíllam húmilem respéxit Deus.
R. Et de meis viscéribus génui Deum et hóminem.

 

 

Lectio 3
Prov 8:34-36; 9:1-5.
34 Beátus homo qui audit me, et qui vígilat ad fores meas quotídie, et obsérvat ad postes óstii mei.
35 Qui me invénerit, invéniet vitam, et háuriet salútem a Dómino;
36 Qui autem in me peccáverit, lædet ánimam suam. Omnes, qui me odérunt, díligunt mortem.
1 Sapiéntia ædificávit sibi domum, excídit colúmnas septem.
2 Immolávit víctimas suas, míscuit vinum et propósuit mensam suam.
3 Misit ancíllas suas ut vocárent ad arcem et ad mœ́nia civitátis:
4 Si quis est párvulus, véniat ad me. Et insipiéntibus locúta est:
5 Veníte, comédite panem meum, et bíbite vinum quod míscui vobis.

R. Beáta es, Virgo María, quæ Dóminum [vel: omnium] portásti, Creatórem mundi [vel: saeculorum]:
* Genuísti qui te fecit, et in ætérnum pérmanes Virgo.
V. Ave, María, grátia plena; Dóminus tecum.
R. Genuísti qui te fecit, et in ætérnum pérmanes Virgo.
V. Glória Patri, et Fílio, * et Spirítui Sancto.
R. Genuísti qui te fecit, et in ætérnum pérmanes Virgo.

 

 

Lectio 4

Ex libro sancti Joánnis Damascéni de fide orthodóxa

Liber 4, Cap. 15.

Jóachim lectíssimam illam ac summis láudibus dignam mulíerem Annam matrimónio sibi copulávit. Verum, quemádmodum prisca illa Anna, cum sterilitátis morbo laboráret, per oratiónem ac promissiónem, Samuélem procreávit; eódem modo hæc étiam, per obsecratiónem et promissiónem, Dei Genetrícem a Deo accépit, ut ne hic quoque cuíquam ex illústribus matrónis céderet. Itaque grátia (nam hoc sonat Annæ vocábulum) Dóminam parit (id enim Maríæ nómine significátur). Vere étenim rerum ómnium conditárum Dómina facta est, cum Creatóris Mater éxstitit. In lucem autem éditur in domo probáticæ Jóachim, atque ad templum addúcitur. Ac deínde, in domo Dei plantáta atque per Spíritum sagináta, instar olívæ frugíferæ virtútum ómnium domicílium effícitur; ut quæ vidélicet ab omni hujúsce vitæ et carnis concupiscéntia mentem abstraxísset, atque ita vírginem una cum córpore ánimam conservásset, ut eam decébat, quæ Deum sinu suo exceptúra erat.

R. Sicut cedrus exaltáta sum in Líbano, et sicut cypréssus in monte Sion: quasi myrrha elécta,

* Dedi suavitátem odóris.

V. Et sicut cinnamómum et bálsamum aromatízans.

R. Dedi suavitátem odóris.

 

 

Lectio 5

Ex libro sancti Ambrósii Epíscopi de Virgínibus

Liber 2, post initium.

Talis fuit Maria, ut ejus uníus vita ómnium sit disciplína. Si ígitur auctor non dísplicet, opus probémus; ut, quæcúmque sibi ejus exoptat præmium, imitétur exemplum. Quantæ in una vírgine spécies virtútum émicant! Secretum verecúndiæ, vexíllum fidei, devotiónis obsequium; virgo intra domum, comes ad ministérium, mater ad templum. O quántis illa virgínibus occurret! quantas complexa, ad Dóminum trahet, dicens: Hæc torum fílii mei, hæc thálamos nuptiales immaculáto servávit pudóre!

R. Quæ est ista quæ procéssit sicut sol, et formósa tamquam Jerúsalem?

* Vidérunt eam fíliæ Sion, et beátam dixérunt, et regínæ laudavérunt eam.

V. Et sicut dies verni circúmdabant eam flores rosárum et lília convállium.

R. Vidérunt eam fíliæ Sion, et beátam dixérunt, et regínæ laudavérunt eam.

 

 

Lectio 6

Quid ergo éxsequar cibórum parsimóniam, officiórum redundantiam: álterum ultra natúram superfuísse, álterum pene ipsi natúræ defuísse? Illic nulla intermissa témpora, hic congeminatos jejúnio dies. Et, si quando reficiéndi successísset volúntas, cibus plerumque obvius, qui mortem arcéret, non delicias ministraret. Dormire non prius cupiditas quam necessitas fuit; et tamen, cum quiésceret corpus, vigilaret animus, qui frequenter in somnis aut lecta répetit, aut somno interrupta continuat, aut dispósita gerit, aut gerenda prænuntiat.

R. Ornátam monílibus fíliam Jerúsalem Dóminus concupívit:

* Et vidéntes eam fíliæ Sion, beatíssimam prædicavérunt, dicéntes: * Unguéntum effúsum nomen tuum.

V. Astitit regína a dextris tuis in vestítu deauráto, circúmdata varietáte.

R. Et vidéntes eam fíliæ Sion, beatíssimam prædicavérunt, dicéntes:

V. Glória Patri, et Fílio, * et Spirítui Sancto.

R. Unguéntum effúsum nomen tuum.

 

 

Lectio 7

Léctio sancti Evangélii secúndum Lucam

Luc 11:27-28.

In illo témpore: Loquénte Jesu ad turbas, extóllens vocem quædam múlier de turba dixit illi: Beátus venter qui te portávit. Et réliqua.

Homilía sancti Bedæ Venerábilis Presbýteri

Lib 4. cap. 49. in Luc. 11.

Magnæ devotiónis et fidei hæc mulier osténditur, quæ, scribis et pharisǽis Dóminum tentántibus simul et blasphemántibus, tanta ejus incarnatiónem præ ómnibus sinceritáte cognóscit, tanta fiducia confitétur, ut et præséntium prócerum calumniam, et futurórum confúndat hæreticórum perfidiam. Nam, sicut tunc Judǽi, Sancti Spíritus ópera blasphemándo, verum consubstantialémque Patri Dei Fílium negábant; sic hǽretici póstea, negando Maríam semper Vírginem, Sancti Spíritus operante virtúte, nascitúro cum humanis membris Unigenito Dei, carnis suæ matériam ministrásse, verum consubstantialémque matri Fílium hóminis fatéri non debére dixérunt.

R. Felix namque es, sacra Virgo María, et omni laude digníssima:

* Quia ex te ortus est sol justítiæ, Christus, Deus noster.

V. Ora pro pópulo, intérveni pro clero, intercéde pro devóto femíneo sexu: séntiant omnes tuum juvámen, quicúmque célebrant tuam sanctam festivitátem.

R. Quia ex te ortus est sol justítiæ, Christus, Deus noster.

 

 

Lectio 8

Sed, si caro Verbi Dei secúndum carnem nascentis a carne Vírginis matris pronuntiátur extranea, sine causa venter qui eam portasset, ubera quæ lactássent, beatificántur. Dicit autem Apóstolus: Quia misit Deus Fílium suum, factum ex mulíere, factum sub lege. Neque audiéndi sunt, qui legéndum putant: Natum ex mulíere, factum sub lege, sed Factum ex mulíere; quia concéptus ex útero virginali, carnem non de níhilo, non aliunde, sed materna traxit ex carne. Alioquin nec vere Fílius hóminis dicerétur, qui originem non haberet ex hómine. Et nos ígitur, his contra Eutychen dictis, extollámus vocem cum Ecclésia catholica, cujus hæc mulier typum gessit, extollámus et méntem de médio turbárum, dicamusque Salvatori: Beátus venter qui te portávit, et ubera quæ suxísti. Vere enim beáta parens, quæ, sicut quidam ait, Enixa est puérpera Regem, qui cælum terramque tenet per sæcula.

R. Beátam me dicent omnes generatiónes,

* Quia fecit mihi Dóminus magna qui potens est, et sanctum nomen ejus.

V. Et misericórdia ejus a progénie in progénies timéntibus eum.

R. Quia fecit mihi Dóminus magna qui potens est, et sanctum nomen ejus.

V. Glória Patri, et Fílio, * et Spirítui Sancto.

R. Quia fecit mihi Dóminus magna qui potens est, et sanctum nomen ejus.

 

 

Lectio 9

Quinímmo beáti qui áudiunt verbum Dei et custódiunt. Pulchre Salvátor attestatióni mulíeris ánnuit, non eam tantúmmodo quæ Verbum Dei corporáliter generáre merúerat, sed et omnes qui idem Verbum spiritáliter audítu fídei concípere, et boni óperis custódia vel in suo vel in proximórum corde párere et quasi álere studúerint, asséverans esse beátos; quia, et éadem Dei Génitrix, et inde quidem beáta quia Verbi incarnándi minístra facta est temporális, sed inde multo beátior quia ejúsdem semper amándi custos manébat ætérna.

Te Deum.

Victoria's motet is beautiful of course; the text is used as the 3rd antiphon at Lauds.

Alas, I'm seeing that only less than thirty minutes of video was recorded at Barroux. I will check their own page (as opposed to the one at YouTube) but I doubt that is any more complete: still, Terce is Terce, and the Introit, perhaps... and the Gloria, or most of it. Will add the orations of Saint Columbanus if the recording gets as far as the collect, ahem.

Ad Tertiam.

M le Curé is celebrating Holy Mass today, and Dr Ratovondrahety is at the organ.

Introitus. Sedulius. Salve, sancta Parens, eníxa puérpera Regem: qui cœlum terrámque regit in sǽcula sæculórum. Ps. 44, 2. Eructávit cor meum verbum bonum: dico ego ópera mea Regi. ℣. Glória Patri.

Kyrie, Gloria.

Oratio. Deus, qui beátam Maríam semper Vírginem, Spíritus Sancti habitáculum, hodiérna die in templo præsentári voluísti: præsta, quǽsumus; ut, ejus intercessióne, in templo glóriæ tuæ præsentári mereámur. Per Dóminum . . . in unitáte ejúsdem.

Léctio libri Sapiéntiæ.
Eccli. 24, 14-16.
Ab inítio et ante sǽcula creáta sum, et usque ad futúrum sǽculum non désinam, et in habitatióne sancta coram ipso ministrávi. Et sic in Sion firmáta sum, et in civitáte sanctificáta simíliter requiévi, et in Jerúsalem potéstas mea. Et radicávi in pópulo honorificáto, et in parte Dei mei heréditas illíus, et in plenitúdine sanctórum deténtio mea.

Graduale. Benedícta et venerábilis es, Virgo María: quæ sine tactu pudóris invénia es Mater Salvatóris. ℣. Virgo, Dei Génetrix, quem totus non capit orbis, in tua se clausit víscera factus homo.

Allelúja, allelúja. ℣. Post partum, Virgo, invioláta permansisti: Dei Génetrix, intercéde pro nobis. Allelúja.

✠ Sequéntia sancti Evangélii secúndum Lucam
Luc. 11, 27-28.
In illo témpore: Loquénte Jesu ad turbas, extóllens vocem quædam múlier de turba, dixit illi: Beátus venter, qui te portávit, et úbera, quæ suxísti. At ille dixit: Quinímmo beáti, qui áudiunt verbum Dei, et custódiunt illud.

I see that Dr DiPippo has posted an article for the feast at New Liturgical Movement (there are others, in different years, at that most excellent site). A brief excerpt, from the Divine Liturgy of Saint John Chrysostom in the Byzantine Rite.

Ἄγγελοι, τὴν Εἴσοδον τῆς Πανάγνου ὁρῶντες, ἐξεπλήττοντο πῶς ἡ Παρθένος εἰσῆλθεν, εἰς τὰ Ἅγια τῶν Ἁγίων. Ὡς ἐμψύχῳ Θεοῦ κιβωτῷ, ψαυέτω μηδαμῶς χεὶρ ἀμυήτων, χείλη δὲ πιστῶν τῇ Θεοτόκῳ ἀσιγήτως φωνὴν τοῦ Ἀγγέλου ἀναμέλποντα, ἐν ἀγαλλιάσει βοάτω· Ὄντως ἀνωτέρα πάντων ὑπάρχεις, Παρθένε ἁγνή. 

The angels, on seeing the entrance of the All-holy One, were amazed that the Virgin entered into the Holy of Holies. Since she is a living Ark of God, let profane hands in no way touch Her, but let the lips of believers unceasingly sing to the Mother of God, raising up a song with the angel’s voice, and cry out in rejoicing, ‘Truly, thou art exalted above all, O pure Virgin!’ 

Credo.

Offertorium. Luc. 1, 28 et 42. Ave, María, grátia plena; Dominus tecum: benedícta tu in muliéribus, et benedíctus fructus ventris tui.

Secreta. Tua, Dómine, propitiatióne, et beátæ Maríæ semper Vírginis intercessióne, ad perpétuam atque præséntem hæc oblátio nobis profíciat prosperitátem et pacem. Per Dóminum.

Sanctus, Agnus Dei.

Communio. Beáta viscera Maríæ Vírginis, quæ portavérunt ætérni Patris Fílium.

Postcommunio. Sumptis, Dómine, salútis nostræ subsídiis: da, quǽsumus, beátæ Maríæ semper Vírginis patrocíniis nos ubíque prótegi; in cujus veneratióne hæc tuæ obtúlimus majestáti. Per Dóminum.

LDVM