Pópulum húmilem salvum fácies, Dómine, et óculos superbórum humiliábis...

Today is the feast simplex of Saint Pantaleon, Martyr, and the Thursday within the 8th week post Pentecosten. At Barroux, the Sunday Mass, Suscepimus Deus misericordiam tuam, was sung, it being a feria in their kalendarium. 

Nicomedíæ pássio sancti Pantaleónis médici, qui, pro fide Christi, a Maximiáno Imperatóre tentus, et equúlei pœna ac lampadárum exustióne afflíctus, sed inter hæc, Dómino sibi apparénte, refrigerátus, gládii tandem ictu martýrium consummávit (c 305).

Lectio 3
Pantáleon Nicomediénsis, nobilis médicus, ab Hermoláo presbytero in Jesu Christi fide eruditus, baptizátus est. Qui mox patri Eustorgio persuasit, ut Christianus fieret. Quare, cum Nicomedíæ póstea Christi Dómini fidem líbere prædicaret, et ad ejus doctrinam omnes cohortarétur, Diocletiáno imperatóre, equuleo tortus, et, admotis ad ejus corpus láminis candéntibus, cruciátus est. Quam tormentórum vim æquo et forti animo ferens, ad extremum gládio percússus, martyrii corónam adeptus est.

Te Deum.

 

Introitus. Ps. 47, 10-11. Suscépimus, Deus, misericórdiam tuam in médio templi tui: secúndum nomen tuum, Deus, ita et laus tua in fines terræ: justítia plena est déxtera tua. Ps. ibid., 2. Magnus Dóminus, et laudábilis nimis: in civitate Dei nostri, in monte sancto ejus. ℣. Glória Patri.

Oratio. Largíre nobis, quǽsumus,Dómine, semper spíritum cogitándi quæ recta sunt, propítius et agéndi: ut, qui sine te esse non póssumus, secúndum te vívere valeámus. Per Dóminum.

Léctio Epístolæ beáti Pauli Apóstoli ad Romános.
Rom. 8, 12-17.
Fratres: Debitóres sumus non carni, ut secúndum carnem vivámus. Si enim secúndum carnem vixéritis, moriémini: si autem spíritu facta carnis mortificavéritis, vivétis. Quicúmque enim spíritu Dei aguntur, ii sunt fílii Dei. Non enim accepístis spíritum servitútis íterum in timóre, sed accepístis spíritum adoptiónis filiórum, in quo clamámus: Abba, Pater. Ipse enim Spíritus testimónium reddit spirítui nostro, quod sumus fílii Dei. Si autem fílii, et herédes: herédes quidem Dei, coherédes autem Christi.

Graduale. Ps. 30, 3. Esto mihi in Deum protectórem, et in locum refúgii, ut salvum me fácias. ℣. Ps. 70, 1. Deus, in te sperávi: Dómine, non confúndar in ætérnum.

Allelúja, allelúja. ℣. Ps. 47, 2. Magnus Dóminus, et laudábilis valde, in civitáte Dei nostri, in monte sancto ejus. Allelúja.

✠ Sequéntia sancti Evangélii secúndum Lucam.
Luc. 16, 1-9.
In illo témpore: Dixit Jesus discípulis suis parábolam hanc: Homo quidam erat dives, qui habébat víllicum: et hic diffamátus est apud illum, quasi dissipásset bona ipsíus. Et vocávit illum et ait illi: Quid hoc audio de te? redde ratiónem villicatiónis tuæ: jam enim non póteris villicáre. Ait autem víllicus intra se: Quid fáciam, quia dóminus meus aufert a me villicatiónem? fódere non váleo, mendicáre erubésco. Scio, quid fáciam, ut, cum amótus fúero a villicatióne, recípiant me in domos suas. Convocátis itaque síngulis debitóribus dómini sui, dicébat primo: Quantum debes dómino meo? At ille dixit: Centum cados ólei. Dixítque illi: Accipe cautiónem tuam: et sede cito, scribe quinquagínta. Deínde álii dixit: Tu vero quantum debes? Qui ait: Centum coros trítici. Ait illi: Accipe lítteras tuas, et scribe octogínta. Et laudávit dóminus víllicum iniquitátis, quia prudénter fecísset: quia fílii hujus sǽculi prudentióres fíliis lucis in generatióne sua sunt. Et ego vobis dico: fácite vobis amicos de mammóna iniquitátis: ut, cum defecéritis, recípiant vos in ætérna tabernácula.

Offertorium. Ps. 17, 28 et 32. Pópulum húmilem salvum fácies, Dómine, et óculos superbórum humiliábis: quóniam quis Deus præter te, Dómine?

Secreta. Súscipe, quǽsumus, Dómine, múnera, quæ tibi de tua largitáte deférimus: ut hæc sacrosáncta mystéria, grátiæ tuæ operánte virtúte, et præséntis vitæ nos conversatióne sanctíficent, et ad gáudia sempitérna perdúcant. per Dóminum.

Communio. Ps. 33, 9. Gustáte et vidéte, quóniam suávis est Dominus: beátus vir, qui sperat in eo.

Postcommunio. Sit nobis, Dómine, reparátio mentis et córporis cæléste mystérium: ut, cujus exséquimur cultum, sentiámus efféctum. Per Dóminum.

The prose Inviolata from the rite or use of the Dominicans.

LDVM