Dómine, Dóminus noster, quam admirábile est nomen tuum in univérsa terra!

In the Traditional Rite today is the feast of the Most Holy Name of Jesus, celebrated tomorrow, I believe, in the Pauline Rite. An ordinary dreary wintery day here, without rain thus far, however.

Ad Vesperas.

Jesu, dulcis memória,
Dans vera cordis gáudia:
Sed super mel, et ómnia,
Ejus dulcis præséntia.

Nil cánitur suávius,
Nil audítur jucúndius,
Nil cogitátur dúlcius,
Quam Jesus Dei Fílius.

Jesu, spes pœniténtibus,
Quam pius es peténtibus!
Quam bonus te quæréntibus!
Sed quid inveniéntibus?

Nec lingua valet dícere,
Nec líttera exprímere:
Expértus potest crédere,
Quid sit Jesum dilígere.

Sis, Jesu, nostrum gáudium,
Qui es futúrus prǽmium:
Sit nostra in te glória,
Per cuncta semper sǽcula.

Ad Matutinum.

Jesu, Rex admirábilis,

Et triumphátor nóbilis,

Dulcédo ineffábilis,

Totus desiderábilis.

Quando cor nostrum vísitas,

Tunc lucet ei véritas,

Mundi viléscit vánitas,

Et intus fervet cáritas.

Jesu, dulcédo córdium,

Fons vivus, lumen méntium,

Excédens omne gáudium,

Et omne desidérium.

Jesum omnes agnóscite,

Amórem ejus póscite:

Jesum ardénter quǽrite,

Quæréndo inardéscite.

Te nostra, Jesu, vox sonet,

Nostri te mores éxprimant,

Te corda nostra díligant,

Et nunc, et in perpétuum.

Ad Laudes.

Jesu decus angélicum,

In aure dulce cánticum,

In ore mel miríficum,

In corde nectar cǽlicum.

Qui te gustant, esúriunt;

Qui bibunt, adhuc sítiunt;

Desideráre nésciunt,

Nisi Jesum, quem díligunt.

O Jesu mi dulcíssime,

Spes suspirántis ánimæ!

Te quærunt piæ lácrimæ,

Te clamor mentis íntimæ.

Mane nobíscum, Dómine,

Et nos illústra lúmine;

Pulsa mentis calígine,

Mundum reple dulcédine.

Jesu, flos Matris Vírginis,

Amor nostræ dulcédinis,

Tibi laus, honor nóminis,

Regnum beatitúdinis.

Amen.

Lectio 4
Sermo sancti Bernárdi Abbátis
Sermo 15 super Cantica, circa medium
Non otióse Spíritus Sanctus nomen Sponsi óleo cómparat, cum ita dóceat sponsam ad Sponsum clamáre: Oleum effúsum nomen tuum. Oleum enim lucet, pascit et ungit. Fovet ignem, nutrit carnem, lenit dolórem: lux, cibus, medicína. Vide idem nunc et de Sponsi nómine: Lucet prædicátum, pascit recogitátum, invocátum lenit et ungit. Et percurrámus síngula. Unde putas in toto orbe tanta et tam súbita fídei lux, nisi de prædicáto nómine Jesu? Nonne in hujus nóminis luce Deus nos vocávit in admirábile lumen suum; quibus illúminatis, et in lúmine isto vidéntibus lumen, dicat mérito Paulus: Fuístis aliquándo ténebræ, nunc autem lux in Dómino?

R. Sperent in te, qui novérunt nomen tuum:
* Quóniam non dereliquísti quæréntes te, Dómine.
V. Exsúrge, Dómine, ádjuva nos, et líbera nos propter nomen tuum.
R. Quóniam non dereliquísti quæréntes te, Dómine.

Lectio 5
Hoc dénique nomen coram régibus, et géntibus, et fíliis Israël portáre jussus est idem Apóstolus; et portábat nomen tamquam lumen, et illuminábat pátriam, et clamábat ubíque: Nox præcéssit, dies autem appropinquávit. Abiciámus ergo ópera tenebrárum, et induámur arma lucis, sicut in die honéste ambulémus. Et monstrábat ómnibus lucérnam super candelábrum, annúntians in omni loco Jesum, et hunc crucifíxum. Quómodo lux ista resplénduit ac perstrínxit cunctórum intuéntium óculos, quando de ore Petri, tamquam fulgur egrédiens, claudi uníus corporáles plantas solidávit et bases, multósque spirituáliter cæcos illuminávit? Numquid non ignem sparsit, cum ait: In nómine Jesu Christi Nazaréni surge et ámbula?

R. Confiteámur nómini tuo magno,
* Quóniam terríbile et sanctum est.
V. Hi in cúrribus, et hi in equis, nos autem in nómine Dómini, Dei nostri, invocábimus.
R. Quóniam terríbile et sanctum est.

Lectio 6
Nec tantum lux est nomen Jesu, sed est et cibus. An non tóties confortáris, quóties recordáris? Quid æque méntem cogitántis impínguat? Quid ita exercitátos réparat sensus, virtútes róborat, végetat mores bonos atque honéstos, castas fovet affectiónes? Aridus est omnis ánimæ cibus, si non óleo isto infúnditur; insípidus est, si non hoc sale condítur. Si scribas, non sapit mihi, nisi légero ibi Jesum. Si dísputes aut cónferas, non sapit mihi, nisi sonúerit ibi Jesus. Jesus mel in ore, in aure melos, in corde júbilus. Sed est et medicína. Tristátur áliquis nostrum? Véniat in cor ejus Jesus, et inde sáliat in os. Et ecce ad exórtum nóminis lumen, núbilum omne díffugit, redit serénum. Lábitur quis in crimen? currit ínsuper ad láqueum mortis desperándo? Nonne, si ínvocet nomen vitæ, conféstim respirábit ad vitam?

R. Læténtur omnes, qui sperant in te, Dómine, in ætérnum exsultábunt, et habitábis in eis, et gloriabúntur in te omnes,
* Qui díligunt nomen tuum.
V. Dómine, in lúmine vultus tui ambulábunt, et in nómine tuo exsultábunt tota die.
R. Qui díligunt nomen tuum.
V. Glória Patri, et Fílio, * et Spirítui Sancto.
R. Qui díligunt nomen tuum.

Lectio 7
Léctio sancti Evangélii secúndum Lucam
Luc 2:21
In illo témpore: Postquam consummáti sunt dies octo, ut circumciderétur Puer: vocátum est nomen ejus Jesus. Et réliqua.

Homilía sancti Bernárdi Abbátis
Sermo 1 de Circumcisione
Magnum et mirábile sacraméntum! Circumcíditur Puer, et vocátur Jesus. Quid sibi vult ista connéxio? Circumcísio nempe magis salvándi, quam Salvatóris esse vidétur; et Salvatórem circumcídere pótius decet, quam circumcídi. Sed agnósce mediatórem Dei et hóminum, qui ab ipso nativitátis suæ exórdio divínis humána sóciat, ima summis. Náscitur ex mulíere, sed cui fecunditátis fructus sic accédat, ut non décidat flos virginitátis. Pannis invólvitur; sed panni ipsi angélicis láudibus honorántur. Abscónditur in præsépio; sed próditur radiánte stella de cælo. Sic et circumcísio veritátem suscéptæ probat humanitátis; et nomen, quod est super omne nomen, glóriam índicat majestátis. Circumcíditur tamquam verus Abrahæ fílius; Jesus vocátur tamquam verus Fílius Dei.

R. Tribulatiónem et dolórem invéni:
* Et nomen Dómini invocávi.
V. Turris fortíssima nomen Dómini, in ipso sperávi, et adjútus sum.
R. Et nomen Dómini invocávi.

Lectio 8
Neque enim ad ínstar priórum meus iste Jesus nomen vácuum aut ináne portat: non est in eo magni nóminis umbra, sed véritas. Cǽlitus síquidem índitum nomen Evangelísta testátur, quod vocátum est ab Angelo, priúsquam in útero conciperétur. Et atténde verbi profunditátem: Postquam natus est Jesus, Jesus vocátur ab homínibus, qui vocátus est ab Angelo, priúsquam in útero conciperétur. Idem quippe et Angeli Salvátor et hóminis; sed hóminis ab incarnatióne, Angeli ab inítio creatúræ. Vocátum est, ait, nomen ejus Jesus, quod vocátum est ab Angelo. In ore ergo duórum vel trium téstium stat omne verbum; et ipsum, quod in Prophéta abbreviátum, maniféstius in Evangélio légitur caro factum.

R. Exspectábo nomen tuum, Dómine,
* Quóniam bonum est in conspéctu sanctórum tuórum.
V. Ut confiteámur nómini sancto tuo, et gloriémur in laude tua.
R. Quóniam bonum est in conspéctu sanctórum tuórum.
V. Glória Patri, et Fílio, * et Spirítui Sancto.
R. Quóniam bonum est in conspéctu sanctórum tuórum.

Lectio 9
Sermo 2 de Circumcisione
Mérito sane, dum circumcíditur puer, qui natus est nobis, Salvátor vocátur; quod vidélicet ex hoc jam cœ́perit operári salútem nostram, immaculátum illum pro nobis sánguinem fundens. Neque enim jam quǽrere est Christiánis, cur volúerit Dóminus Christus circumcídi. Propter hoc síquidem circumcísus est, propter quod natus, propter quod passus. Nihil horum propter se, sed ómnia propter eléctos. Nec in peccáto génitus, nec a peccáto circumcísus, nec mórtuus est pro peccáto suo; magis autem propter delícta nostra. Quod vocátum est, inquit, ab Angelo, priúsquam in útero conciperétur. Vocátum plane, non impósitum: nempe hoc ei nomen est ab ætérno. A natúra própria habet, ut sit Salvátor: innátum est ei nomen hoc, non índitum ab humána vel angélica creatúra.

Te Deum laudámus...

Today continues to be the feast of the Most Holy Name in the Ioannes XXIII arrangement (from 1960, commonly called 'the '62', like a warship lost at sea in a world-memorable act of sabotage by its own captain). M le Curé is the celebrant and Dr Ratovondrahety is accompanying the Mass on the great organ. 

Introitus. Phil. 2, 10-11. In nómine Jesu omne genu flectátur, cœléstium, terréstrium et infernórum: et omnis lingua confiteátur, quia Dóminus Jesus Christus in glória est Dei Patris. Ps. 8, 2. Dómine, Dóminus noster, quam admirábile est nomen tuum in univérsa terra! ℣. Glória Patri.

Oratio. Deus, qui unigénitum Fílium tuum constituísti humáni géneris Salvatórem, ei Jesum vocári jussísti: concéde propítius; ut, cujus sanctum nomen venerámur in terris, ejus quoque aspéctu perfruámur in cœlis. Per eúndem Dóminum.

Oratio. de Octava Sancti Stephani Protomartyris. Omnípotens sempitérne Deus, qui primítias Mártyrum in beati Levítæ Stephani sánguine dedicásti : tríbue, quǽsumus ; ut pro nobis intercéssor exsístat, qui pro suis étiam persecutóribus exorávit Dóminum nostrum Iesum Christum, Fílium tuum : Qui tecum vivit et regnat.

Léctio Actuum Apostolorum
Act. 4, 8-12.
In diébus illis: Petrus, replétus Spíritu Sancto, dixit: Príncipes pópuli et senióres, audíte: Si nos hódie dijudicámur in benefácto hóminis infírmi, in quo iste salvus factus est, notum sit ómnibus vobis et omni plebi Israël: quia in nómine Dómini nostri Jesu Christi Nazaréni, quem vos crucifixístis, quem Deus suscitávit a mórtuis, in hoc iste astat coram vobis sanus. Hic est lapis, qui reprobátus est a vobis ædificántibus: qui factus est in caput ánguli: et non est in alio áliquo salus. Nec enim aliud nomen est sub cœlo datum homínibus, in quo opórteat nos salvos fíeri.

Graduale. Ps. 105, 47. Salvos fac nos, Dómine, Deus noster, et cóngrega nos de natiónibus: ut confiteámur nómini sancto tuo, et gloriémur in glória tua. ℣. Isai. 63, 16. Tu, Dómine, Pater noster et Redémptor noster: a sǽculo nomen tuum.

Allelúja, allelúja. ℣. Ps. 144, 21. Laudem Dómini loquétur os meum, et benedícat omnis caro nomen sanctum ejus. Allelúja.

✠ Sequéntia sancti Evangélii secúndum Lucam
Luc. 2, 21.
In illo témpore: Postquam consummáti sunt dies octo, ut circumciderétur Puer: vocátum est nomen ejus Jesus, quod vocátum est ab Angelo, priúsquam in útero conciperétur.

Offertorium. Ps. 85, 12 et 5. Confitébor tibi, Dómine, Deus meus, in toto corde meo, et glorificábo nomen tuum in ætérnum: quóniam tu, Dómine, suávis et mitis es: et multæ misericórdiæ ómnibus invocántibus te, allelúja.

Terribly beautiful at Barroux earlier this morning. 

Secreta. Benedíctio tua, clementíssime Deus, qua omnis viget creatúra, sanctíficet, quǽsumus, hoc sacrifícium nostrum, quod ad glóriam nóminis Fílii tui, Dómini nostri Jesu Christi, offérimus tibi: ut majestáti tuæ placére possit ad laudem, et nobis profícere ad salútem. Per eúndem Dóminum.

Secreta. de Octava. Súscipe, Dómine, múnera pro tuórum commemoratióne Sanctórum : ut, sicut illos pássio gloriósos effécit ; ita nos devótio reddat innócuos. Per Dóminum.

Communio. Ps. 85, 9-10. Omnes gentes, quascúmque fecísti, vénient et adorábunt coram te, Dómine, et glorificábunt nomen tuum: quóniam magnus es tu et fáciens mirabília: tu es Deus solus, allelúja.

 

Postcommunio. Omnípotens ætérnae Deus, qui creásti et redemísti nos, réspice propítius vota nostra: et sacrifícium salutáris hóstiæ, quod in honórem nóminis Fílii tui, Dómini nostri Jesu Christi, majestáti tuæ obtúlimus, plácido et benígno vultu suscípere dignéris; ut grátia tua nobis infúsa, sub glorióso nómine Jesu, ætérnæ prædestinatiónis titulo gaudeámus nómina nostra scripta esse in cœlis. Per eúndem Dóminum.

Postcommunio. de Octava. Auxiliéntur nobis, Dómine, sumpta mystéria : et, intercedénte beáto Stéphano mártyre tuo, sempitérna protectióne confírment. Per Dóminum nostrum.

LDVM